bis denn


U irgendwie hani z znacht geschter chli verhängt,

E haubstund z spät, träfffpunkt bahnhof bärn,

Hüt morgen no z kafi über d textbletter glährt

U vor dr huustür macht d bousteu e huere lärm

 

I mah nüm, lamer chli zyt

Es pocht i mim chopf, was isch geschter nomau gsi,

hüt heschemr gschribe du heigsch gwartet uf mi

hey sorry duet m rächt leid i has huere versifft

 

es isch morge aber scho zimlech spät muess mi entscheide 

ob zmorge oder scho zmittag vorbereite, oder nüt vo beidem

im chüeuschrank isch wider mau nüt gschids dinn

aso machi mr es nutellabrot und e schoggimiuch

 

z brot vo vorgeschter u zähn iz verchläbt vom nutella

i frage mi skeptisch was de tag no seu bringe

i weis nid wasi dr seu zrüg schribe, bismer nid bös

es ligt ächt nid a dir, i ha di eigentlech huere gern aber

 

i bruche rueh, du mueschmer chli zyt lah

i mues zersch mit mir säuber klar cho

bevori mit anderem scheiss eppis cha ahfa

i bruche rueh, du mueschmer chli zyt lah

wart uf mi aber lueg nid zlang uf d uhr

süsch blibt irgendeinisch zyt stah

 

 

sorry, i säges no einisch

das mit geschter abe duet mr ungloublech leid

i ha würklech ersch hüt gseh dasdmr uf d combox hesch gred

ha dr flugmodus din gha u bi zimlech früeh iz bett

 

i bruche zyt, mues mini fantasie la waute

i ha so viu vor gha dasi ha vergässe z tröime

ha nur no luschtlos id lääri gluegt

es wird zyt dasi mr zyt nime für anders züg

 

i wet e boum pflanze, zu nena-musig tanze,

bob marley singe, e täuer spaghetti verschlinge,

wider mau zeichne elei i mim zimmer,

fotoaube ahluege vo mim brüetsch u mir aus chinder

 

tagebuech schribe, mikado spile,

mittem trottinet ar aare entlang u gheimversteck finde,

zyt vergäss ä u i gedanke under gah 

texte schribe und d vergangeheit losla

 

i bruche rueh, du mueschmer chli zyt lah

i mues zersch mit mir säuber klar cho

bevori mit anderem scheiss eppis cha ahfa

i bruche rueh, du mueschmer chli zyt lah

wart uf mi aber lueg nid zlang uf d uhr

süsch blibt irgendeinisch zyt stah

i bruche rueh, du mueschmer chli zyt lah

irgendeinisch mäudi mi widr

i hoffe i bi de wider zfride, bis denn